Район  шкулĕсенче   чăваш   чĕлхипе литературине тата тăван ен культурине вĕрентекенсем ака уйăхěн 25-мěшěнче йăлана кěнě XI меслетлĕх фестивальне пухăнчěç. Чăваш   чĕлхипе литературине,  тăван ен культурине вĕрентес ĕçе пысăк пахалăхпа туса пырас  тĕллевсене тěпе хурса  7 вĕрентекен тата ялти вулавăш ертÿçи  уçă уроксем тата класс тулашĕнчи ĕçсем ирттерчěç. Пĕтĕмĕшле пĕлÿ паракан Чакаç вăтам шкулĕнче ěçлекен Л.А.Петрова тата Н.Н.Ильина «Чěлхем! Санпа тěнче уççи тытатăп» йěкěр урока (чăваш   чĕлхипе литератури тата акăлчан чĕлхи) 10-мěш класс ачисене хутшăнтарчěç.  Васильева И.Н. (Пайкилт вăтам шкулĕнче чăваш   чĕлхипе литератури, тăван ен культури вĕрентекен) 7-мěш класра И.Лисаевăн «Чире парăнма çуралман» хайлавě тăрăх «Çитес текен çитетех» темăпа урок ирттерчě. 6-мěш класс вěренекенěсем Л.А.Фёдоровăпа  (Атнаш тěп шкулĕнче чăваш   чĕлхипе литератури вěрентекенпе) чăваш чěлхи урокěнче япала ячěн камăнлăх формипе калаçура тата çырура тěрěс усă курма хăнăхрěç. Катек ялěн вулавăш ертÿçи С.К. Ананьева Аслă Вĕрентекенĕмĕр И.Я.Яковлев çуралнăранпа 165 çитнине халалласа ирттернě «Тěлěнтермěш уйра» вăйă урокра Иван Яковлевич пурнăçěпе пултарулăхне чи лайăх пěлекене тупса палăртрě.

5, 8, 10-мěш классенче вĕренекенсемпе шкул учителěсем Т.И. Васильева, З.В. Петрова тата В.К. Дмитриев ертсе пынипе «Макçăм мучи ачасемпе уявра»  юрăллă-ташăллă композиципе уява вěçлерěç, хăнасене те ташлама кăларчěç.

Катек вăтам шкулĕн  хăнисем – Канаш районěпе кÿршěллě Вăрнар районěн шкулěсенче вěрентекенсем те уява хутшăнчěç, туслăх кěперě хывса кайрěç.

Канаш район администрацийĕн вĕренÿ управленийĕ тата Катек вăтам шкулĕ Чăваш чĕлхи кунě ячěпе пурне те чун-чěререн саламлать, ырлăх-сывлăх, телей, ăнăçу сунать.