2019 çулхи нарăс уйăхĕн 18-мĕшĕнче эпир, 3,4,5-мĕш классенче вĕренекенсем, Раççей Геройĕ Н.Ф.Гаврилов ячĕпе хисепленекен Янкăлч вăтам шкулĕнче вырнаçнă Ĕçпе паттăрлăх музейне кайса куртăмăр.
Шкулта пире музей директорĕ Калиса Михайловна Иванова ăшшăн кĕтсе илчĕ. Экскурсоводсем те хамăр тантăшсемех , 4 -6- мĕш классенче вĕренекенсем пулни пире çав тери тĕлĕнтерчĕ. Вĕсем пире музей историйĕпе паллаштарчĕç, Раççей Геройĕ Н.Ф.Гаврилов пурнăçĕ, пултарулăхĕ, çитĕнĕвĕсем çинчен каласа пачĕç. Янкăлч шкулĕнчен вĕренсе тухнă ял ачи Раççей Президенчĕн В.В.Путинăн шанчăклă çынни пулса тăма пултарнинчен эпир тĕлĕнтĕмĕр, хамăр ентешшĕн савăнтăмăр. Музейра курмалли, тĕлĕнмелли çав тери нумай. Кунта мамонт пĕççин шăмă ванчăкĕ те, моллюсксен раковинисем те пур. Эпир вĕсене тытса курма та пултартăмăр. Калиса Михайловна ăнлантарса панă тăрăх ку экспонатсем темиçе ĕмĕр каялла чăваш тăрăхĕнче тинĕс пулнине çирĕплетсе параççĕ.
Шкултан вĕренсе тухса пĕр-пĕр ĕçре палăрнă кашни çыннах асра тытаççĕ Янкăлчсем. Çар çынни е вĕрентекен, сутуçă е ял хуçалăхĕнче тăрăшакан, тухтăр е искусство çынни – пĕрех, тĕппи – Тăван çĕр-шыва усă кӳме пултарни. Çамрăк экскурсоводсем кашнин çинчен каласа пама пултараççĕ, çамрăккисене ĕçе хисеплеме, ĕç çыннине чыс тума мĕн пĕчĕкрен вĕрентеççĕ. Кунта Аслă Аттелĕх вăрçинче пулнă салтаксен кĕтесĕ, инçетри Афганистанра, Чечняра интернационал тивĕçне пурнăçланисен экспозицийĕ те пур. Хисепе тивĕçнисем хăйсем те парăма юлмаççĕ. Кашниех музея мĕнле те пулин экспонат парнелет: çар тумĕ, орден-медаль, фуражка, салтак каски т.ыт.те. Музейра Çурçĕр полюсĕнче пулса курнă атă-унти те пур. Çак атта тăхăнса Янкăлч шкулĕн директорĕ пулнă Н.Е.Егоров Раççей Геройĕпе пĕрле полюса çитсе килни çинчен каласа пачĕç пире. Хăш-пĕр экспонатсене эпир тăхăнса асăнмалăх сăн ӳкерттертĕмĕр. Калиса Михайловна каласа панă хрусталь шăнкăрав историйĕ кашнинех тыткăнларĕ. Инçетри Беслан ачисене эпир чунтанах шеллерĕмĕр.
Музейри курав шкул картине куçрĕ. Кунта эпир МИ-8Т вертолёт çине ларса куртăмăр. Кашниех чăн-чăн вертолетчик вырăнĕнче, штурвал умĕнче ларса курма пултарчĕ.
Экскурси пире çав тери килешрĕ!
Даша Алексеева, Катек вăтам шкулĕ, 5-мĕш класс
