Ака уйăхĕн 19-мĕшĕнче эпир, Катек вăтам шкулĕн 5-мĕш класĕнче вĕренекен Дарья Алексеева тата 4-мĕш класра вĕренекен Аделия Иванова, Шупашкара Çамрăк корреспондентсен III слетне кайса килтĕмĕр. Cлет «Хыпар» издательство çуртĕнче иртрĕ. Уява Чăваш Республикин тĕрлĕ районĕсенчен хыпар пĕлтерсе тăракан авторсемсĕр пуçне Тутарстанри, Пушкăртри, Чĕмпĕрти çамрăк корреспондентсем те пулчĕç. Хамăр районти Вăрăмпуç шкулĕн вĕренекенĕсемпе те тĕл пултăмăр эпир кунта. Шупашкарта пире çав тери ăшшăн кĕтсе илчĕç. Хамăра эпир çăлтăрсем пекех туйрăмăр. Мĕншĕн тетĕр-и? Ара пирĕтен интервью илеççĕ, пĕр вĕçĕмсĕр сăн ÿкерттереççĕ. Сцена çинчен «Тантăш» хаçатăн çамрăк корреспонденчĕсене «Хыпар» издательство çурчĕн тĕп редакторĕ Татьяна Вашуркина, нумай çул хушши «Тантăшăн» тĕп редакторĕнче тăрăшнă хамăр ентеш, çухайкассинче çуралса ӳснĕ Галина Платонова саламларĕ. «Шăп сирĕн хыпарусене пула чăваш тĕнчин пурнăçне туллин çутатса пама пултаратпăр эпир», - тесе хавхалантарчĕç пире вĕсем. Чыслав хыççăн тантăшçăсем пире кăмăла кайнă ăсталăх класĕсене йыхравларĕç. Сакăр ăсталăх класĕнчен эпир иккĕшне суйласа илтĕмĕр. Малтанах эпир «Интернетра страница ертсе пырасси тата блогер ĕçĕ-хĕлĕ» мастер класне кайрăмăр. Кунта эпир Канаш районĕнчи Кайăкьял каччипе Александр Витальевич Яшков (Богатырь) блогерпа паллашрăмăр. Чăваш блогерĕ хамăр ентеш пулнине пĕлсен тĕлĕнтĕмĕр, çав вăхăтрах мăнаçлантăмăр. Çамрăк корреспондентсем хушшинче блогер ĕçĕпе кăсăлакансем çав тери нумай пулчĕç. Богатырь пире блогер ĕçне-хĕлне еплерех пуçласа янипе, çак ĕçĕн вăрттăнлăхĕсемпе паллаштарчĕ. Унтан эпир «Сенкер экран вăрттăнлăхĕсемпе» паллашрăмăр. Телепередачăсене диван çинче курса ларма кăна канлĕ иккен. Пĕчĕк сюжет ÿкерме вара çав тери нумай тар тăкмалла. Кĕлеткене тÿрĕ те илемлĕ, микрофона хăш алра тата мĕнле тытма пĕлни тележурналистшăн çав тери кирлĕ. Унсăр пуçне мĕн хыççăн мĕн каламаллине те пуçра тытмалла, çухалса кайма юрамасть. Дубль хыççăн дубль… Чылай вăхăт хушши тар тăкнă хыççăн тĕллеве пурнăçларăмăр. Кĕске сюжет ÿкерме пултартăмăр.
Кĕске тăхтав хыççăн «Тантăш» хаçат ирттерекен тĕрлĕ конкурс çĕнтерÿçисене чысларĕç. 4-мĕш класс вĕренекенĕ Аделия Иванова та сцена çинчен Хисеп хучĕ илчĕ. Вăл «Ял историне пĕлетĕр-и?» конкурса хутшăнса III вырăна тивĕçнĕ.
Уявăн тепĕр асамлă кĕтменлĕхĕ – çамрăк корреспондентсене Алексей Московский юрăç саламлама килни. Залри ачасем юратнă юрăç сцена çинчен юрлама пуçласан вырăнта лараймарĕç, ташлама тухрĕç. Эстрада юрăçипе ирттернĕ флешмоб, чĕрĕ «Теттепе» ташлани вăхăт иртнине те систермерĕç. Тулли кăмăлпа эпир уявран салантăмăр, анчах нумайлăха мар. Çулталăк тăршшĕпе тăрăшсан тепĕр çул татах та тĕл пулăпăр-ха!!!
