Ака уйăхĕн 24-мĕшĕнче пирĕн шкулта чăваш чĕлхи кунне халалланă савăнăçлисемпе тавçăруллисен ăмăртăвĕ пулчĕ. Çут тĕнчене килсессĕнех пире аннесем çепĕç чĕвĕлти чăваш чĕлхипе юрла-юрла сăпкара сиктереççĕ, унтан çут тĕнчепе паллаштараççĕ. Пурнăçри пĕрремĕш утăмсене тума та пире анне пиллесе парнеленĕ тăван чĕлхе вăй парать. Çавна май чăваш чĕлхи уявне эпир юратнă аннесемпе пĕрле ирттерес терĕмĕр. Ăмăртура амăшĕсен тата вĕренекенсен ушкăнĕсем тупăшрĕç. Тупăшакансем  тăван халăхăмăрăн историне, культурине еплерех пĕлнине тĕрĕслерĕç. Кану саманчĕсенче ачасем хăйсен пултарулăхне кăтартрĕç. Уява виççĕмĕшпе тăваттăмĕш классенче вĕренекенсен «Алран кайми аки-сухи» юрăпа уçрĕç, куракансем ăна ура çине тăрса юрларӗ . 9-мĕш класра вĕренекен Лиза Васильевăпа 4-мĕшĕнчи Олег Митрофанов «Пăкăварить» сценка лартрĕç. Куракансем ку номера хапăлласа йышăнчĕç. Иккĕмĕш тата тăххăрмĕш класра вĕренекенсем савăк  ташăсемпе  савăнтарчĕç. Вуннăмĕш класри Денис тата улттăмĕшĕнчи Максим Николаевсем артист пулмах çуралнă пулĕ. Пиччĕшĕпе шăллĕ куракансене монолог тата юптару парнелерĕç. Хĕрÿ тупăшура амăшĕсен ушкăнĕ çĕнтерчĕ. Вĕсем пире тăван çĕре, тăван халăха юратма, тăван чĕлхе пуласлăхĕшĕн тăрăшма пиллесе хăварчĕç. Уява хутшăма кăмăл тунă аннесене, Надежда Васильевна Константинована, Светлана Васильевна Абрамована, Эльвира Васильевна Митрофанована, Наталья Николаевна Трофимована, Надежда Владимировна Дмитриевана, Ирина Геннадьевна Аристархована, Олимпиада Николаевна Гурьевана, Наталья Юрьевнам Андреевнана, Людмила Аркадьевна Никитинана  тав сăмахĕ калас килет.