Пирĕн шкул пурнăçĕ яланах интереслĕ. Мĕншĕн тетĕр-и? Тĕрлĕ мероприяти ирттеретпĕр эпир. Тĕл пулу та нумай пулать.
Ака уйăхĕн 26-мĕшĕнче пирĕн шкула чăваш инстаблогерĕ Богатырь килсе кайрĕ. Вăл килессе эпир çав тери чăтăмсăррăн кĕтрĕмĕр. Хăйне ку таранччен пĕрре те куçа-куçăн курман пулин те унăн пурнăçне çоциаллă çыхăнура йĕрлесех пыратпăр-çке-ха. Ҫывăх пĕлĕшрен те çывăхрах вăл хăш-пĕр ачасемшĕн. Александр Витальевич Яшков (социаллă çыхăнура эпир ăна Богатырь ятпа пĕлетпĕр) хамăр ентешех, Канаш районĕчи Кайăкьял каччи, Вăтапуçĕнчи вăтам шкула пĕтернĕ. Инстаграммри кун кĕнекине вăл 2015 çултанпа çырать. Блогер кун кĕнекине йĕрлекенсен йышĕ тăватă çул хушшинче 119 пинрен иртнĕ. Вĕсен хушшинче пирĕн шкул ачисем те чылай. Юлашки вăхăтра Александр Витальевич сывă пурнăçа аталантарассине тимлет. Çавна май республикăри чылай шкула тухса çÿрет, флешмоб ирттерет.
Катек шкулĕнчен йыхрав илсен Богатырь хаваспах килĕшрĕ. Хăнана эпир хăй юрлакан «Чун» юрăпа тата 9 класра вĕренекен Наталия Смоловапа Елизавета Васильева хатĕрленĕ флешмобпа кĕтсе илтĕмĕр.
Малтанах Александр Яшков хăйĕн ĕçĕ-хĕлĕпе паллаштарчĕ, ачасене кăсăклантаракан ыйтусем çине хуравларĕ. Унтан хăна вĕренекенсемпе пĕрле çивĕч ачасен спорт ăмăртăвне хутшăнчĕ. Тупăшакансем чăваш ачисен ĕлĕкхи вăййисене аса илчĕç: «лаша» çине утланса чупрĕç, ĕç вăхăтĕнче канма ларсан вылянă вăйăсене аса илчĕç, «Çăпаталла», «Чушкăлла» вылярĕç, канат туртрĕç. Ăмăрту икĕ паттăр, Катек паттăрĕпе (вун пĕрмĕш класра вĕренекен Владислав Митрофанов) Кайăкьял паттăрĕ, тупăшнипе вĕçленчĕ. Ушкăн пуçлăхĕсем турник çинче туртăнчĕç, ал вăйне виçрĕç. Икĕ паттăрпа тупăшма тăххăрмĕш класра вĕренекен Дима Гурьев, вун пĕрмĕшĕнчи Максим Данилов кăмăл турĕ. Тĕрлĕ тупăшура палăрнă паттăрсене тăххăрмĕш класра вĕренекен хĕрсен ушкăнĕ ташăпа саламларĕ. Унтан хăнана Катек ачисем вăйă картине чĕнчĕç. Блогерпа пĕрле эпир «Илемлĕ, илемлĕ» юрă юрларăмăр. Александр Витальевич асăнмалăх парне туса пачĕ: çак тĕл пулăвăн видеосюжетне йĕркелерĕ. Чăваш блогерне эпир çак парнешĕн чунтан тав тăватпăр.