Ака уйăхĕн 25-мĕшĕнче шкулта Чăваш чĕлхин кунне халалланă пысăк уяв иртрĕ. Унта 1-11 классенче вĕренекенсем, шкул вĕрентекенĕсем пурте хастар хутшăнчĕç. Уяв программинче чăваш юрри-кĕвви янăрарĕ. 5-6 классенче вĕренекенсен илемлĕ чăваш ташшисем куракансен чунне тыткăнларĕç. Пиллĕкмĕшсен пултаруллă артисчĕсем «Вĕçкĕн мулкач» инсценировка лартса пачĕç. Уяври конкурссенче çĕнтернĕ тавçăруллă тата маттур ачасем парнесене тивĕçрĕç. Вĕрентекенсем те маттур пулчĕç. Акăлчан чĕлхи вĕрентекен Эльвира Васильевна Митрофанова хăйĕн тĕрлĕ енлĕ пултарулăхĕпе куракансене савăнтарчĕ.